Auto Ad

2016年6月24日 星期五

[氹仔]mezza9 Macau。大廚零距離,「與廚共饗」自選、自助式晚餐

請移玉步至mezza9 Macau 2017加強版:


〖2016-6月下旬〗



在澳門吃自助餐有一個難處,就是選擇太多,都唔知點揀好。最近新濠天地君悅酒店內的mezza9 Macau亦加入了自助餐戰場,推出名為「與廚共饗」自選、自助式晚餐,這是一個由揀選食材的環節已經開始「自主話事」的自助餐,一邊食,仲可以一邊同大廚吹水偷師。在此謝過君悅酒店的邀請及師兄的安排。


mezza9位於君悅酒店,佔地廣闊,共有6個開放式廚房,各個山頭由不同菜系盤據。

正式開始戰鬥前,先到這個色彩繽紛的中央水吧補充點水分先!

咖啡或茶這些普通嘢就一定有的。但一場來到,一定要試試這個「全自動鮮榨橙汁」。睇住一個個橙碌入部機裡面,被即時開邊榨汁,出品啖啖果肉,100%無添加。

仲要試下呢排勁Hit的Infused Water,即是用新鮮水果泡成的鮮果水,相傳服後有美顏減齡之效。味道不甜,微微帶點果酸,飲完一杯即刻有種後生咗幾年的幻覺,可以精力充沛地展開一場混戰喇!


場內菜式琳琅滿目,等我帶大家由頭盤開始打地圖啦~
Coldcut及沙律區

凍海鮮?有!但這些平時在其他自助餐裡爭崩頭的凍蝦凍青口,在這裡並不是敵軍主力!

預先調製的沙律杯,口味不常見,好似「粗麥粉(Couscous)羊奶芝士沙律」「西瓜羊奶芝士」的配搭就幾特色。



喜歡自力更新的朋友,都可以在這裡mix一個啱feel的自選沙律。

30個月的黑毛豬火腿,現切!
火腿入口甘香,味道豐滿不死鹹,帶著些許甜味。正嘢,速取蜜瓜攻略之~
(而蜜瓜已是非常貼心地在旁候命,值得一讚)

還有各種火腿及醃肉
各位旅澳遊客,留意圖右,這些紅色罐仔裡面的就是來澳必吃的葡國老人牌辣沙丁魚。在旅途上沒機會吃到的話,一定要試一點呀~




吃完少許冷盤墊胃,隨即轉入海鮮區
嘩,呢個海鮮陣會唔會霸氣咗少少?!!


海鮮包括:基圍蝦、鮑魚、帶子、花蟹、龍虎斑、黃花魚、沙白蜆、魷魚鬚
大堆海鮮曬你冷,一個唔覺意以為自己去咗海邊魚市場。
你會話:「車~幻覺嚟㗎啫!呃我唔到ge~~」我初初都以為這只是個有姿勢冇實際的擺設,點知店員居然同我講:「鍾意食咩?你想點煮都得㗎~」
係真唔係先?不如蒸條斑嚟爽下?
店員詢問我們的檯號,幫我們下單,片刻之後⋯⋯

真係蒸左一條三斤幾重的龍虎斑過嚟=口=
在自助餐裡蒸條魚,都真係第一次!
(註:份量按該桌人數而定,就算人少少都可以切一部分來蒸的~)

龍虎斑肉質緊實。這一刻真想叫碗靚仔來撈汁呀⋯⋯
驚魂未定,叫多個椒鹽鮑魚仔來試下自己係咪發緊夢。
鮑魚炸得乾身,爽口彈牙。用鮑魚來做椒鹽,真係好奢華!

除了清蒸、椒鹽外,這些海鮮還可以怎樣煮?
可以果皮蒸、花雕蒸、蒜蓉蒸、豉汁蒸、豉椒炒、薑蔥炒、香煎,仲可以加豆醬或用美極鮮醬油煎,總之你想點煮就點煮!

各種中式煮法齊備,但想食得下西餐又得唔得呢?
當然可以!想吃西式口味的話,這裡有立魚、鱸魚、三文魚、吞拿魚和魷魚可供烤或煎,還有本自助餐的重點推介——
新鮮生猛的波士頓龍蝦!
場內設有龍蝦缸,龍蝦大約是八兩至近一斤一隻。

即場現撈。

快刀即劏。

最受歡迎的做法是直火香烤

邊位帶著焦香,龍蝦膏融在舌上,正呀!

原汁原味清蒸也不錯。

還可以做成上湯龍蝦。

啖啖肉!!
新鮮龍蝦肉彈牙鮮甜,確實冇得輸!一人食佢兩隻,已經差不多回到本。



位於龍蝦缸旁邊的是另一個奪得我芳心的山頭:烤肉精選


這裡有羊架、西冷牛扒、羊肉串等等,還有一條長長的牛肉:就是傳說中的「Butcher's Steak」,橫膈膜柳


這個Cut不常在坊間見到,更別說是在大堆頭自助餐裡出現,全隻牛只有僅僅一條這樣的牛柳。
烤至5成熟,咬落帶有香烤味,肉汁非常充沛,質地軟滑不韌,Juicy得來又有嚼感。不容錯過!



食食下,見到有位師傅推著這銀色車仔走遍全場。

是點心車?不,是原隻烤澳洲羊腿

這麼大隻的羊腿,擔心烤起來肉質老韌?唔怕,原來羊腿是用低溫慢煮的方式烹煮幾小時後,再進行烤焗。於是即使熟度均勻,肉質依然保持多汁軟嫩,味道鮮甜。見到這架銀色車仔路過,一定要截住佢。



吃了這麼多,飽未?講個壞消息給你聽,來到這裡只能算是上半場,還有一個好消息,就是還有各國美食等你攻略:


中式美食區
這裡最熱鬧!!見住師傅們不停拋鑊贊酒起火,超級精彩!



見明檔咁靚仔,忍唔住斬舊大叉燒回去加餸。

乳豬片還有得夾片包包,好似去酒樓飲咁。

第一次在自助餐裡見到成個菜檔!
同海鮮一樣,10多款新鮮蔬菜都可以任你想點煮就點煮,這天就遇到澳門街市裡有緣才出現的龍鬚菜蕃薯葉
食到飽飽地,淥番碟菜消下滯也是好主意,或者你心血來潮,想整碟勝瓜煮沙白,都得!問下師傅有咩好介紹,分分鐘有驚喜。



還有一盅盅的燉湯。足料!



中菜旁邊就是泰式美食區

吃泰菜,冬陰功是一定唔少得的。這裡是沒加椰汁的版本,在澳門比較少見。以為冇椰汁會淡味,點知味道竟是如此濃烈酸鮮,好有衝擊性!

面對一鍋鍋睇落好相似、食落大不同的煲仔咖哩,泰菜大廚Chef Mum親自出來同我地解畫。


見我地傻仔咁連食都唔知點食,仲親手幫我地夾埋。

米通脆脆配椰汁肉碎醬,睇落好簡單,食落味道超複雜。陣陣濃郁椰汁香在口內爆發。




胃部空間嚴重不足,還是要到西菜區一遊:



鵝肝蘑菇雞卷,幾有心思!

一鍋蟹腳多到爆晒出嚟的燴海鮮




是不是還有一區未介紹?對,就是港澳人至愛,日式美食區


刺身壽司,是吃自助餐的指定動作來的。



軟殼蟹天婦羅即點即炸。炸得乾身輕盈,紙上幾乎不殘留油份。好手勢!




攻略到這裡,個胃已經Full咗12成,要鳴金收兵了?且慢,是時候出動秘密武器,召喚第二個胃上場!
來到色彩繽紛的甜品區,又是我選擇困難症發作的時刻。






這裡不但有Infused Water,還有近年風靡全球少女心的果汁冰棒。潮呀!

疏乎厘是mezza9的招牌甜品,有Bailey's酒味薑味。這天吃了這個是Bailey's味,入口即溶,滲出香甜酒味,果然有水準。


想食個椰皇布甸,但點解同我攞去燒?

原來是加上一層焦糖脆皮的椰皇布甸


這裡還有自家製的雪糕,今天遇到曲奇和抹茶口味。兩球雪糕上擠上一層牛奶霜淇淋,配料任你加,又是時候發揮創意小宇宙。




先前已提及,澳門自助餐多不勝數,每個都有自己的特色。而這裡的獨特之處,就是廚房就在餐廳內,臨場感十足,邊睇邊食,真正色香味俱全,令人食慾倍增。
食到飽飽地,就可以向D師傅請教偷師,問完泰廚又跑去問中廚,趁機消耗少少卡路里,返來又繼續大擦一餐。
為何叫做「自選、自助式晚餐」?因為這裡部分菜式烹調需時,你只需選定材料及煮法,留下檯號,餐點煮好後就會送到你的桌子,完全不需排隊。你的寶貴光陰將全數用來大吃大喝、吹水偷師、陷入選擇困難的局面、以及探索胃空間的極限⋯⋯

mezza9Macau「與廚共饗」自選,自助式晚餐
星期一至四Mop499+一位,星期五至日Mop599+一位
營業時間:下午6:00至晚上11:00





澳門君悅酒店三樓
8868 1920





2 則留言:

Related Posts Plugin for WordPress, Blogger...