Auto Ad

2016年4月16日 星期六

[澳門]Blesscuit 祝奇餅。好意頭曲奇餅掃餐牌報告

〖2016-4月中旬〗



日前有幸獲邀來到這家由長腿女神陳敏之開的曲奇餅店。實不相瞞,幾個月前我路過此店時,已被繽紛Sharp醒的店面吸左埋去,無奈當天剛吃飽飯,連試食的戰鬥力都欠奉,所以單純到此一遊。這回一次過補番晒,仲要有機會掃餐牌,在此謝過店家先!

目前Blesscuit在澳門有兩間分店,一家在連勝馬路,當天來到這一家在黑沙環區的分店,位置在君悅灣,東方明珠巴士總站對出。紅金招牌超醒目。

店內色彩繽紛,睇見都開心。


首先你會見到這些宮廷式玻璃兜,裡面有各種味道的曲奇餅。
正所謂唔買都要試下,店員問我想試邊款,我面皮成尺厚咁話「唔好意思我會試晒」(肯定句式)。
冇錯,14款曲奇,每隻都咁特別,叫人點揀?唯有「D. 以上皆食」

仲有4款牛油千層酥。試!仲要用特別ge食用方法來試!有幾特別?稍後揭曉!

食到喉嚨乾乾地,店員會沖杯茶過你飲。公關小姐說現在他們還在選茶的過程中,這天喝到Twining's,話晒英國名茶,有Heart喎!



Blesscuit這個字,是「Blessings」和「Biscuit」二字合體,也就是「祝福的餅乾」。其實背後有段估架喎!
原來整餅師傅會在整餅的同時對麵團講一些祝福語,好似施魔法咁,希望吃曲奇餅的客人能接收到這份正能量。
(其實都唔係冇科學根據。有報告指,水分子的形狀會受聲音影響,聽著語調溫柔的說話的水分子能結成完整漂亮的雪花狀。詳情可看此書。)

繼我話Blesscuit大紅大紫的包裝都已經夠晒喜氣,啱晒用來送禮!

有結婚禮盒套裝。

細細盒的回禮套裝。

仲可以揀番張心意卡。

單味曲奇小盒裝,送俾人又得,送俾自己都得,得左。


祝・平安 PEACE (49pcs) MOP348

這一盒是曲奇餅曬冷組合,全14款曲奇餅有齊。色彩繽紛超吸睛。

一睇說明書先知,原來曲奇餅材料大部分是來佬貨,唔係法國就係意大利加拿大英國美國,每一啖都坐飛機過來的。用料純天然,手工製作,連粘合劑都冇落,食得安心無負擔。
你可能會唔知邊隻味打邊隻,其實包裝背部有個Code,對照番說明書就解倒碼喇~

事不宜遲,全部14款味道,開晒俾大家參考!! 

金鑽松露曲奇 

Blesscuit的招牌,黑松露 Crossover 竹炭曲奇餅,加埋一抹搶眼的閃令令金粉,夠晒雍容華貴!
味道是甜中帶鹹,滿腔黑松露香氣,難忘呀!



紅莓水果茶曲奇 

此店另一項暢銷招牌。入口一抹清新果香,充滿初戀的感覺。令人很想帶去野餐,享受青春好時光的一款。



煙燻火腿曲奇 

介紹完初戀即刻來個很Rock的口味!
近年很流行把火腿或煙肉混入甜點中,呢一款就Mix很有火花!
咬落是酥脆到「索索聲」的粗粒火腿乾,鹹得來有楓糖平衡。從沒想過曲奇餅也可以用「惹味」來形容!整番杯紅酒先!



鯷魚曲奇

火腿之外又一鹹香選擇!鯷魚用來整Pizza就聽過,擺落曲奇入面估唔到感覺又幾新鮮。
混有鯷魚與香料的曲奇,口味甘香得來餘韻綿長,微微有點辣,好特別,第二度食唔到。
鹹味曲奇當中我自己就最鍾意呢一款喇!(冇錯,是因為辣)


芝士曲奇 

由4種歐洲芝士聯手打造,絕對香口,芝士的餘韻在齒間久久不散,希望你在吃火腿曲奇和鯷魚曲奇時還留下半杯紅酒。



蕃茄曲奇 

另一款意大利風情,蕃茄味就略略帶點酸甜味。香甜微酸,就似那個整蠱你但又偷偷暗戀你的女同學般,好俏皮。



原味牛油曲奇 

開始介紹甜味曲奇,梗係要由最原始的口味開始。
經典的Sugar Butter Cookie,最單純的甜味,帶著婉約的雲呢拿香氣。好似好簡單冇乜特別,但你第一眼就知道自己可以同佢廝守終生。



黑糖腰果曲奇 

睇到「黑糖」兩個字以為好甜,點知又唔怕喎!入口主要是黑糖深沉的香氣,咬碎腰果粒後,果仁味就Blend埋一齊,效果非常細膩。
又要講多次,我其實不太喜歡吃甜品,但呢款幾有驚喜。



綠茶曲奇

梗係唔少得呢位來自東洋的大眾情人!
這裡的綠茶曲奇絕無人工添加劑,色澤純樸,味道天然冇假味。表面有些糖粒,口感UP!



拖肥曲奇

不過講到口感,一定係呢款最出位。
香甜得來有少少海鹹吊味,加埋粗粒好咬感的朱古力碎,味道口感皆複雜。



香橙曲奇

活力十足的柑橘味,夠晒Zesty!最適合返工做到悶悶地時,整一塊黎提神!



檸檬杏仁曲奇

初頭我百思不得其解,點解有橙味又要有檸檬味?但其實呢兩款略有不同。
檸檬味比香橙味低調一些,杏仁味同樣溫婉,兩者半分天下,比起熱情的香橙又要細緻一些。


最後要介紹兩款造型不同的曲奇。之前的都是薄身曲奇,只有這兩款做成厚身,咬落更鬆化!
醇香咖啡曲奇

不得了,一打開包裝就聞到咖啡香,食落更加唔駛講,特別是因為曲奇餅夠厚身,香氣縈繞不去,又有Nuts增加口感,實屬下午茶佳品。



情迷朱古力曲奇

千呼萬喚始出來,點都輪到朱古力粉墨登場喇啩!!
一睇呢個色水就知夠晒足料。味道果然很濃郁,可可的微苦會停留在味蕾上,餘韻深長。
其實咁,試食時我覺得呢款普通,原來是當時吃得太少,要成粒啪,要成個口都充滿朱古力的濃香!



以上咁多位佳麗,有邊位最得你歡心?
咁快就選擇困難症發作?仲有4款千層酥俾你揀喎!分別是黑松露、紅莓玫瑰、芝士香草及原味楓糖
前文講到千層酥有個特別的食法,到底有幾特別?

閃閃鐵盒(上方)的就是千層酥喇~ 

打開盒,有支野ge? 

金鑽松露千層酥

要食得招積,首先你要有一條千層酥。松露曲奇的千層酥版本,同樣咁奢華!


吃的時候,即場加埋呢支松露蜜糖
之前唔係冇食過在表面抹完蜜糖再拿去烤的酥餅,但現場DIY,都係第一次試!
蜜糖偏向流質,可以滲入酥皮之間,真正融合為一體。與曲奇版本不同,這一款是甜的。108層輕盈酥皮,啖啖黑松露香味,加上蜂蜜的甘甜,一口下去,幸福感就在舌上化開!

其他味道又有不同醬汁配搭。OneMan就試到呢度先,大家唔好客氣,快D去門市試晒佢啦~



依家Blesscuit做緊85折,飛雲機會來鳥~~



整埋個價目表俾大家參考下:






Blesscuit Macau 祝奇餅
黑沙環中街1059號君悦灣地下D鋪
連勝馬路165號寶麗安大廈, 地下A座 Macau
2821 0102



沒有留言:

張貼留言

Related Posts Plugin for WordPress, Blogger...